Ljósmæðravakt fékk samfellur að gjöf

samfellur19 1

Það sýndi sig enn og aftur á dögunum hvað ljósmæðravakt HSS á góða að í samfélaginu hér syðra. Þá kom hópur fólks færandi hendi með samfellur handa nýburum sem fæðast á deildinni.

Um var að ræða samstarfsverkefni hjá Samvinnu - starfsendurhæfingu hjá Miðstöð símenntunar á Suðurnesjum, Virk starfsendurhæfingarsjóði, Lindex, Nettó og Reykjanesapóteki.

Hugmyndin fæddist, ef svo má segja, í hópastarfi Samvinnu á vegum VIRK, en þar var ákveðið að gefa ljósmæðravaktinni 150 samfellur með myndskreytingu eftir eina úr hópnum.

Lindex lagði þeim svo til samfellurnar, sem eru úr lífrænni bómull, og auk þess styrktu Nettó og Reykjanesapótek við verkefnið.

Við afhendinguna þakkaði Jónína Birgisdóttir, deildarstjóri ljósmæðravaktarinnar, innilega fyrir gjöfina sem mun vafalaust koma að góðum notum, en foreldrar munu fá að taka samfelluna með sér heim að lokinni legu.

Fulltrúar Lindex á Íslandi bættu einnig um betur og gáfu fyrirheit um að styrkja deildina enn frekar á næstunni með fatagjöfum.

Starfsfólk og stjórnendur HSS þakka að sjálfsögðu kærlega fyrir gjafirnar og hlýhuginn sem þeim fylgja.

samfellur19 2

Andrea Klara ráðin í starf yfirhjúkrunarfræðings á heilsugæslu HSS

Andrea Klara Hauksdóttir hefur verið ráðin í starf yfirhjúkrunarfræðings á heilsugæslu HSS. Ráðningin er tímabundin til ársloka.

Andrea hefur unnið hjá HSS með hléum allt frá árinu 1993, fyrst sem sjúkraliði á Víðihlíð en síðar sem móttökuritari og læknaritari á heilsugæslunni í Grindavík og svo sem hjúkrunarfræðingur og deildarstjóri í Reykjanesbæ frá árinu 2008, bæði á legudeild og skurðstofu- og speglunardeild. Auk þess hefur Andrea unnið í hlutastarfi sem speglunarhjúkrunarfræðingur í Meltingarsetrinu í Mjódd síðustu ár.

Hún lauk BSc. í hjúkrunarfræðum árið 2009 og meistaragráðu við Háskólann á Akureyri árið 2015 og hefur einnig unnið mikið að félags- og fagstörfum, meðal annars innan Félags íslenskra hjúkrunarfræðinga og fagfélags speglunarhjúkrunarfræðinga.

Andreu er árnað heilla í nýju hlutverki á HSS.

Skúli nýr yfirlæknir á sjúkrasviði HSS

Skuli net

Skúli Tómas Gunnlaugsson hjartalæknir var á dögunum ráðinn í starf yfirlæknis á sjúkrasviði HSS. Hann hefur þegar hafið störf.

Starf yfirlæknis felst í stjórnun og stýringu sjúkradeildar hjá HSS, en yfirlæknir sinnir einnig almennri vinnu á sjúkradeild og móttöku sjúklinga á göngudeild.

Skúli hefur starfað á sjúkradeild HSS síðan í febrúar 2018, en fyrir það var hann búsettur í 20 ár í Bandaríkjunum fyrst við nám í Wisconsin og Iowa, og síðar við störf hjá HIMG í Vestur Virginíu.

Skúla er árnað heilla með óskum um velgengni í nýju starfi.

 

Mynd: Skúli með Markúsi Eiríki Ingólfssyni forstjóra og Fjölni Frey Guðmundssyni, framkvæmdastjóra lækninga.

Full þjónusta á ljósmæðravakt HSS í sumar

vog MarelÞað er með mikilli ánægju sem hægt er að tilkynna að Ljósmæðravakt HSS verður opin með fullri þjónustu í allt sumar.

Undanfarin ár hefur það verið svo að þurft hefur að loka fæðingadeildinni um mánaðarskeið yfir sumartímann og eins og gefur að skilja hefur það komið sér mjög illa fyrir marga. Það er því af sem áður var og verður tekið á móti verðandi og nýbökuðum foreldrum á ljósmæðravaktinni, nótt sem nýtan dag, sumar sem vetur.

We are happy to announce that our delivery service will be open the whole year round. For the last few years we have had to close the delivery unit for a about one month period over the summertime, so all birthing women had to get delivery service outside of Reykjanesbær during that time. But for now on we will be able to provide full service the whole year round.

Öryggisráðstafanir á slysa- og bráðamóttöku HSS

Skjólstæðingar og gestir HSS eru beðnir að athuga eftirfarandi.

Tekin var ákvörðun um að setja upp hurð sem lokar af aðgengi að slysa- og bráðamóttökuganginum. Ástæða þess er ónæði af fólki sem hefur farið án leyfis inn á slysa- og bráðamóttöku í misjöfnum tilgangi. Það er því mikið öryggisatriði að koma í veg fyrir umgang óviðkomandi inn á deildina.

Einnig hjálpar þetta okkur á HSS við að skapa rólegra umhverfi fyrir skjólstæðinga okkar og styður einnig við persónuvernd.

Viljum við því biðja skjólstæðinga slysa- og bráðamóttöku og myndgreiningadeildar að hafa eftirfarandi í huga:

• Ef þú þarft á þjónustu myndgreiningadeildar (þarft röntgen- eða tölvusneiðmyndatöku) að halda þá kemur þú við hjá móttökuritara, færð þér sæti í biðstofunni og starfsfólk deildarinnar fylgir þér inn.

• Ef þú þarft á þjónustu slysa- og bráðamóttöku að halda þá kemur þú við hjá móttökuritara, færð þér sæti í biðstofunni og starfsfólk deildarinnar fylgir þér inn.

• Ef þú ert alvarlega veik/-ur eða slasaður/slösuð s.s. finnur fyrir brjóstverk eða óbærilegum kviðverkjum þá ferðu fyrst til móttökuritara og móttökuritari upplýsir starfsfólk deildarinnar sem fylgir þér inn.

• Ef mikil biðröð er að móttökuritara og þú ert alvarlega veik/-ur eða slasaður/slösuð, þá ferðu fram fyrir röðina og upplýsir móttökuritara strax um ástand þitt.

Forsetahjónin heimsóttu HSS

Forseti Íslands, Guðni Th. Jóhannesson og eiginkona hans, Eliza Reid komu við á Heilbrigðisstofnun Suðurnesja í dag. Heimsóknin var hluti af opinberri heimsókn forsetahjónanna til Reykjanesbæjar þar sem þau hafa gert víðreist í dag.

Markús Eiríkur Ingólfsson, forstjóri HSS, leiddi gestina um húsakynni HSS og var meðal annars rætt um húsnæðismál stofnunarinnar og margt fleira.

Að kynningunni lokinni hittu Guðni og Elíza starfsfólk HSS í kaffisamsæti. Þar var meðal annars á vegg málverk af Guðna, sem er í eigu Skúla Gunnlaugssonar, yfirlæknis á legudeild HSS.

Heimsóknin var í alla staði ánægjuleg og er forsetahjónunum innilega þakkað fyrir komuna.

Ljósmæðravaktin fékk fallegar myndir að gjöf

Ljósmæðravakt HSS fékk góða gjöf á dögunum þar sem ljósmyndarinn Heiðbrá Rósa Steinþórsdóttir færði deildinni sjö fallegar myndir af hvítvoðungum, sem munu prýða veggi deildarinnar.

Heiðbrá rekur ljósmyndastofuna Heiðbrá Photography en margar myndanna sem hún gaf deildinni eru einmitt af börnum sem fæddust á HSS, eða hafa verið þar í eftirliti.

Starfsfólk ljósmæðravaktarinnar þakkar kærlega fyrir gjöfina og þann hlýhug sem hanni fylgir. Myndirnar munu svo gleðja skjólstæðinga stofnunarinnar um ókomin ár.

Tilraunaverkefni um vinnufyrirkomulag hjúkrunarfræðinga framlengt

Nýjasti stofnanasamningur hjúkrunarfræðinga á HSS felur meðal annars í sér tilraunaverkefni til sex mánaða sem miðar að því að auka fast starfshlutfall hjúkrunarfræðinga og draga úr óreglulegri yfirvinnu. 

Verkefnið hefur gengið afar vel hingað til þannig að ákveðið var að framlengja það út september 2019. Ef það skilar tilætluðum árangri þá mun þetta ákvæði gilda áfram.

Við hvetjum hjúkrunarfræðinga til að kynna sér stofnanasamning HSS og FÍH og hvað felst í tilraunaverkefninu. Um þessar mundir eru margar og fjölbreyttar stöður hjúkrunarfræðinga lausar til umsóknar á HSS. Frekari upplýsingar má finna hér á vef HSS undir „Laus störf“.

Mislingabólusetningar á HSS á morgun og laugardag

Ljóst er að HSS mun fá um 800 skammta af bóluefni gegn mislingum og mun bólusetning hefjast á morgun, föstudaginn 15. mars.

Samkvæmt ákvörðun sóttvarnalæknis hjá Embætti landlæknis, skal bólusetja þá sem eru óbólusettir á aldrinum 12 mánaða til 49 ára, bóluefnið er þeim að kostnaðarlausu, en fullorðnir greiða fyrir komugjald.

Tímabókanir á heilsugæsluna í Reykjanesbæ fara fram á heilsuveru.is en einnig er hægt að bóka tíma í síma 422-0500. Vinsamlegast notið frekar tímabókun í Heilsuveru til að minnka álag á símkerfi stofnunarinnar.

Tímabókanir á heilsugæsluna í Grindavík fara fram í síma 422-0750 milli kl 8-15 alla virka daga. Ekki er verið að bólusetja þar um helgina.

Í fyrstu verður boðið upp á bólusetningar á morgun milli kl 13-16 og á laugardeginum 16. mars kl 9-12 og 13-16.

Þeir aðilar sem hafa fengið eina bólusetningu eða eru eldri en 49 ára (fæddir fyrir 1970) eru ekki í forgangshópi og fá því ekki bólusetningu að sinni.

Ónæmisbældir einstaklingar þurfa að ráðfæra sig við sérfræðilækni sinn til að meta hvort viðkomandi eigi að fá bólusetningu en öllu jöfnu er reynt að forðast að gefa ónæmisbældum mislingasprautu.

Við minnum á að það hefur enginn á Suðurnesjum greinst með mislinga.

Subscribe to this RSS feed